Tura: All India Trinamool Congress (AITC) Meghalaya bilaken a·bachengahachim, indiba da·ora uamangni kam ka·aniko niaton namen ka·sine nikenga, indake ong·ode general election sepangbaengon, AITC-ni kamo ka·sinaniara, changasati NPP-na sorkariko riktaina cholko on·genma?.
AITC Meghalaya-ona sokbachengao Congress-ni Opposition dilgipa sak 11 dilgiparang baksa Congress-oni ong·kate AITC-o napskaha. Jeon Charles Pyngrope, George Lyngdoh, Marthon Sangma, Zenith Sangma aro gipinrang donga, indake Congress-o sakbongasan MLA-rang dongrikaha.
AITC-ni tanggitik Meghalaya-ona sokbaon AITC-ni dilgiparang dongdipgija meeting ba tom·anirangko ong·ataha. Indiba da·ora Trinamool camp-o namen jrip ong·aniko nikna man·skaengjok. Party-ni dilgiparangba bang·bata changon jrip dongtokenga. Beben AITC-ni dilgiparang, ongipa gadangoni kamrangko ka·enga inede aganenga.
Iarangna agreba Garo Hills-oni Congress-ni MDC-rangba party-oni ong·kate AITC-o napbatokaha, jeni a·sel GHADC-oba namen so·sojengjeng ong·ahachim indiba Mukul Sangma baksa skango melie kam ka·giparangoni saksa Boldamgre-i MDC, Stevie Marak, NPP-ona napange NPP-na chakpaaha.
Bang·bata manderangan AITC, Congress-ni vote-ko bon·ataha ine agantokenga, indiba AITC aro Congress dolgnian NPP-na maming dake kenaniko ba sinjetaniko on·na gitan nikmanjaenga. Iarangko niken NPP election-o altuen chena ka·dongenga.
A·doko dingtang dingtang mamlarango jekai cha·bokani, tangka paisa jakkalanio jakkalsretani, teacher-rangni dormaha, ma·mongni project ba uandakgipa mamlarangko sorkariko AITC, nisan ra·na chol dongachim, indiba party, jrip dongaienga.
AITC Meghalaya-na Prashant Kishore-ni dilenggipa I-PAC team chakenga. Uamang manderangni chanchiani aro re·a-doaniko name dake talna kam ka·enga. Minggipin I-PAC team-ba a·doko AITC-ko bilakatna re·mikkanganio jrip dongenga, haida mikkangchi nambate ba rakbate kam ka·na tariengnaba gnang.
Indiba gitcham dilgipa Mukul Sangma, uni kam ka·ani bewalrangko ramramde parakja.
“Ua party-ko dilna sapgipa ong·a, uni gimin Mukul Sangma-ko ramram ong·e ba altue ra·na manja.”
