TURA: Garo Hills Autonomous District Council (GHADC)-ko kajina gamchina u·iatani ja·man Tura jillao Municipality-ko ra·galchina gita Tura-ni MDC Bernard N Marak dabiangenba, joltangtango namroro silroroaniko nirokna gita town committee-rangko tangatpilskachina didiangaha.
Marak-ni parakatani gitade, Tura Municipal Board (TMB) an·tangan GHADC-ni ning·o dongenggipasa ong·genchimoba GHADC-oniko kajina gilskaengachim aro ian Sixth Schedule-ko pe·ani gita ong·engachim.
“TMB-ko Sixth Schedule a·jaoni ning·osa chalaiengoba District Council-onikon kajina gilpilaniara namen kragijani ong·enga,” ine Tura MDC parakataha.
GHADC-ni ning·on donge maikai TMB, GHADC-oniko kajina gilpilna man·aha ineba Marak sing·doangaha.
Tura jillao GHADC-ni bilko TMB ra·sekna jotton ka·enga ine janapatengon, Sixth Schedule a·ja ning·ode TMB, Tribal-rangoniko kajina gilna bil dongja ine Marak talataniko on·angaha.
“Sixth Schedule-ni Article 243-o municipal-rangko Sixth Schedule a·jao chalaina bil on·jani gimin ian niamko pe·a ga·akenga. Uamang GHADC-oniko kajina gilna bil dongja. Iako anga raken jegalenga aro Tura jillao Municipality-ko ra·galenba town committee-rangko tangatpiltaichina nangnikenga,” ine Tura-ni BJP MDC aganaha.
Shillong-o aro Garo Hills-ni municipal area-rangoba town committee-rangko songna bilko on·china gita Meghalaya High Court-ko didina gita ua Shillong-ona re·angaha ineba Marak parakataha.
“Shillong-ode town committee-rangko songna gita High Court hukumko on·manaha aro ia apsan hukumkon Tura-naba nangnikenga. Tura jillao songdongenggipa manderang TMB-na aro GHADC-naba kajinarangko gamna nange neng·nikanirangko man·tokenga. Manderango GHADC-ni pattarang dongengon maina TMB-na kajinarangko gamna nangkugen? Trading licence-rangkoba Council-sa on·enga TMB ong·ja. Town area-rango Tribal-rangoniko TMB-ni kajina gilaniara niamni a·palo ong·a,” ine Marak parakataha.
