TURA: Assam aro Meghalaya a·dokni simarango ru·utbea bilsirangna ong·enggipa golmalko namatna kam ka·anio, Meghalaya a·dokni mitam A·chik songrangko Assam-o napatna tik ka·ahani gimin Garoland State Movement Committee (GSMC) Pedaldoba regional unit-na NPP-chi dilenggipa MDA sorkariko raken jegalataha aro ia songrangko Assam a·doko napatna gita ia songrangara sorkarini a·a ong·ja indiba songo noko songdongenggipa Tribal manderangnisa ong·a ine talataniko on·angaha.
GSMC Pedaldoba regional unit-ni chairman Rimjen Ch Sangma-ni parakatani gitade, British-rangni chasongonin Meghalaya a·dokara Sixth Schedule a·jani ning·o ga·akgipa a·doksa ong·e ia songrangara, a·doko songdongenggipa A·king Nokma, Hima aro Dolloi-rangni ning·osa ong·achim.
“Sixth Schedule a·jarangara a·doko songdongkamgipa manderangni a·arangsa ong·a aro sorkaride ia a·arangko nirokgipasan ong·aia. Sorkaride ia a·ani nokgipa ong·jani gimin maming dakeba gipinna pakwate on·na aro ia a·arangko a·kangna bil dongja indiba manderangni namgnina niamrangkosan tarie on·na man·aia. Supreme Court-ba Tribal-rangni a·arangko ra·sekna bil on·jaha indiba maikai Meghalaya sorkari, A·king Nokma aro songni manderangni permission gri a·dokni ning·o donggipa songrangko Assam-na pakwate on·na man·enga?” ine Sangma sing·doangaha.
Assam aro Meghalaya sorkarirangni Memorandum of Understanding (MoU)-o soi ka·grikaniko jegalatengon, dolgni sorkarirangan name am·sandichenggijasa, a·brio songdongenggipa manderangna on·gimin bilko pe·e ia ja·kuko de·aha ine GSMC Pedaldoba regional unit-ni chairman parakataha.
“Uni gimin chinga ia ja·ku de·aniko raken jegalenga aro ta·raken iani bidingo am·sandie nanga gita ja·kuko de·china dabienga,” ine Sangma parakataha.
