NEW DELHI: A·songni Prime Minister Narendra Modi-ni kosako matnanganirangko dakengon, New Delhi-o game ge·e cha·enggipa manderangni jingjengatengmiting somoio sianggipa sak 700 game ge·e cha·giparangni bidingo maming ku·rangko on·jaengani gimin Meghalaya a·dokni Governor Satya Pal Malik, a·songni Prime Minister-ko sing·doangtaiaha.
Prime Minister Modi-ni kosako matnangatanirangko dakengon, minggittam farm law-rangko jegale game ge·e cha·enggipa manderangni New Delhi-o jingjengatengmiting somoio siangna nanggipa sak 700 game ge·e cha·giparangni bidingo jrip dongenganina Malik, PM Modi-ko sing·doangaha.
“Delhi-o ramram a·sel ong·genchimoba Prime Minister, pangnan an·tangni kalimaniko seachi parakatrongachim indiba sak 700 game ge·e cha·giparangni siani giminde ua an·tangni kalimaniko parakjaha,” ine Meghalaya Governor aganaha.
Rajasthan a·dokni Churu a·jao donggipa Sardarshahar jillo Jaat Samaj-ni gita ong·atanggipa Samaj Jagrati Shatabdi Mahotsav-o Malik, ia kattarangko aganaha.
Game ge·e cha·giparangko apsan meli nangrimenba, an·tangtangni sorkariko rikchina gitaba ua didiangaha.
“A·songo game ge·e cha·giparang ra·pilgiparang gita ong·gija on·giparang gitasa ong·katna nanga. Uamang pilakan nangrime an·tangtangni sorkariko rikna nanga,” ine Malik aganaha.
Meghalaya Governor-ni parakatani gitade, game ge·e cha·enggiparangni neng·nikanirangni gimin ua Prime Minister baksa agangrikna jotton ka·on, uko president ba vice president-ni gadangona ra·doatjawa ine manderang uko jrip dongchina aganskaahachim.
“Indiba anga uamangna aganskaaha, anga dal·dalgipa kamrangko ka·manaha aro da·ode anga game ge·e cha·giparangna dangdike on·skana sikengaha,” ine Malik aganaha.
