TURA: A·song gimikon manienggipa Azadi Ka Amrit Mahotsav-ni bak gita Mongolbar salo, Assam Sonapur-o donggipa Institute of Plasma Research (IPR) baksana Tura Don Bosco College-ni Physics Department nangrimenba, ‘Plasma Popularisation Program’-ko Tura-ni Don Bosco College-o ong·atangaha.
Ia program-ko ong·atanio, India sorkarini Atomic Energy department-ni ning·o donggipa Centre of Plasma Physics – Institute for Plasma Research (CPP-IPR)-ni mingsinggipa scientist-rang re·bae, chatro chatrirangna agan-skie on·angaha.
Ia tom·anio Tura Don Bosco College-ni Principal Fr Bivan Mukhim, tom·anio bak ra·giparangna rimchaksoani kattarangko aganangengon, chatro chatrirangna aro mongsongbate pilak manderangna Science-ni bewalrangko ma·siate on·na gita Science Popularisation program-rangko ong·atna nangchongmotani gimin aganangaha.
Don Bosco College-ni ning·o donggipa Physics department-ni gimin Dr Arindham Ghosh, jinmana talate on·angaha aro CPP-IPR-o ka·enggipa kamrangni gimin Dr BJ Saikai, agan-talate on·angskaaha.
Ia program-ko ong·atanio Dr Rakesh Moulick aro Dr Ngangom Aomoa-ba dingtang dingtang subject-rangni gimin aganangaha aro ia program-ko ong·atanio Don Bosco College-onisan ong·aigija Tura Government College-ni chatro chatrirangba dongpae bak ra·angaha.
