SHILLONG: Meghalaya a·doko aro mongsongbate Garo Hills-o bobil dake chakatanirang ka·sinsin bon·angahaoba da·o ong·gija dakgipa manderang, ULFA-I bobil dolni dakchakanichi dam rakgipa silchidarerangko ra·napbataiengaha ine Opposition dolni dilgipa aro All India Trinamool Congress (AITC)-ni dilgipa Dr Mukul Sangma, mikrakataniko on·angtaiaha.
Sangma-ni parakatani gitade, 2020 bilsini November jao ULFA-I bobil dolni deputy commander-in-chief Drishti Rajkhowa-ni Garo Hills-o an·tangko bame on·na skangan, badiaba bobil dolni manderang, Garo Hills-o re·rurae manderangko rimnaptaiengaha ine ua sorkarina mikrakataniko on·ahachim aro ja·mano Rajkhowa-ni bame on·ani somoioba ua an·tangko nitimgipa sipai sakgni baksasan maming dam rakgipa silchidare grisa bame on·aiahachim.
“ULFA-I bobil dolni dilgipa dam rakgipa silchidarerangkode ra·bite bame on·jaha indiba uamangni jakkalgipa namnamgipa silchidarerangara bao? Iani bidingo a·dok sorkari sandinaba gisik nangjaha aro sandiaba sandijaha. Ia manderangan bobil dake chakatgipa chadamberangko donangaha aro uamangsa da·o Garo Hills aro South West Khasi Hills a·jarangoba re·ruraenga,” ine AITC-ni dilgipa parakataha.
Bobil dakgipa dolrangoni an·pilbae sorkarina bame on·gipa chadamberangni gimin janapatengon, uamangoni bang·batan da·o gitcham biaprangonan re·angpilaha aro sorkari ia manderangni gimin sandipilna nangchongmota ine Dr Mukul dabiangaha.
Batanggimin somoirango Garo Hills-osan ong·aigija Meghalaya a·dokni dingtang dingtang biaprangoba ma·manti silchidare aro gopretna jakkalgipa bang·a bosturangko police-rang rim·na man·ahachim.
Adita salrangna skangsan, West Garo Hills a·jani Dadenggre joloba ma·sina man·gijagipa manderang, police-rangko silchidarerangchi goe chadrapahachim indiba ja·mano police-rang baksa gogrike uamangoni saksade so·otako man·ahachim. Ia mandeoniko police-rang, AK Rifle pongsa aro gulirangko man·ahachim.
