TURA: West Garo Hills District Medical & Health Office-ni gita Block Health Mela-ko Sombar salo, Selsella C&RD Block-ni Rajabala jolo donggipa Kashiabari songo ong·atangaha aro ia mela-ko ong·atanio dingtang dingtang songni manderang re·baenba, Health department-ni ning·o on·enggipa sanna banani cholrangko ra·na gita man·aha.
Ia Block health mela-ko ong·atanio West Garo Hills a·jani District Medical & Health Officer (DM&HO) Dr Bijoy Debbarma, mongsonggipa sokgipa ong·e jinmana aganprakangengon, Health department-ni gita on·enggipa dingtang dingtang scheme aro sanna banani cholrangni bidingo songni nokni manderangna u·iatna gita block health mela-ko April 18 tarikoni 22 tarikona dingtang dingtang block-rango ong·atenga ine parakangaha.
An·tangtangko an·seng baljoke aro bilake rakkina man·na gita namgipa cha·anirangko cha·chinaba ua songni manderangko didiangaha.
COVID-19-ni tikarangko su·e ra·china aro MHIS-ni ning·o on·enggipa dingtang dingtang cholrangko ra·china gitaba Dr Debbarma, songni manderangko didiangaha.
Ia health mela-ko ong·atanio Bhaitbari PHC-ni Medical & Health Officer Dr Pritam Das-ba dongpae jinmana aganprakangengon, iandakgipa block health mela-ko ong·atanichi mai dakgipa namgnirangko aro cholrangko songni manderangna on·enga, uarangni gimin talataniko on·angskaaha.
Ia Block health mela-ko ong·atanio dongpae jinmana aganprakanggipa gipin manderangara, Additional DM&HO Dr Jakrambal A Sangma, Selsella-ni CDPO Madonna T Sangma, Bhaitbari PHC-ni Medical & Health Officer Dr Crislin Sangma, Bhaitbari PHC-ni Ayush Medical Officer Dr Abu Taiob Akond aro gipinrang ong·a.
