TURA: South West Garo Hills a·jao Ampati-oni Purakhasia-ona km 36 ong·gipa PWD ramako 2012-2016 bilsirangni giseposa tariahaoba da·on ia ramarang nosto ong·engaha ine A·chik Holistic Awakening Movement (AHAM) South Western Zone Ampati parakatenba, ia ramako gital dake taripiltaichina sorkario dabiangaha.
AHAM-SWZ Ampati-ni general secretary Wester Sangma-ni parakatani gitade, Ampati-oni Salmanpara gita Purakhasia-ona dakanggipa ramako ‘German Technology’-ni bimingosa tariahachim indiba da·o bilsi 5 bilsi 6-ni gisepon ia ramako nosto ong·na a·bachengskaengahachim.
“Ia ramara Ampati-oni Purakhasia-ona dakanggipa ramao donggipa ritchani ritcha songrangna mongsonggipa rama ong·e manderangna janggi tangani chol gitasa ong·a indiba ia rama da·o nosto ong·na a·bachengengahani a·sel ia songrango donggipa manderang neng·nikanirangko man·na a·bachengengaha,” ine Sangma parakataha.
Indake ong·engon, ia ramako taripiltaina gita ta·raken ia ramani obostarangko niechina aro tangka paisarangko chamatchina gita AHAM-SWZ Ampati, a·dok sorkario dabiangaha.
Ampati-oni Purakhasia-ona dakanggipa ramako taripiltaichina AHAM dabia
Date:
Share post:
