TURA: Indiani mongsonggipa Tennis kal·giparangni dongpaanio, Tura Table Tennis Association (TTTA)-ni gita, Meghalayani Department of Sports and Youth Affairs aro Table Tennis Association of Meghalaya baksa bakrimenba mingsa promotional event-ko Mongolbaro Indoor Sports Hall, Tura-o ong·atangaha, je programon Tura MP, Agatha K Sangma mongsonggipa sokgipa ong·e bakko ra·aha aro West Garo Hills Deputy Commissioner, Ram Singh-ba mandera·ako man·a kragipa sokgipa ong·e bakko ra·aha.
Sports ba kal·susaaniara manderangni janggi tanganio namen mongsonggipa ong·a, Meghalaya-oba kal·susaani a·ba ba cholrangko apaldapatengaha aro bi·sarangnba cholrangko oe on·engaha, dal·dalgipa national aro international tennis player-rangni Turaona re·baanichi, a·jolni chadamberangko Tennis kal·na gisiko nangbatatgnok ine Tura MP Agatha Sangma aganaha.
Ia promotional event-ona, Sharat Kamal Achanta, Reeth Rishya, Archana Kamath, Sanil Shetty aro Kamlesh Mehta gita dakgipa a·songni mongsonggipa tennis player-rang re·baaha, jemangan international level-o India a·songni palo tenni kal·tokenga.
