TURA: Central University Entrance Test (CUET) porikkani bidingo University Grants Commission (UGC) tanggitiksa u·iatahani a·sel chatro chatrirang tarisamsotokna man·jahani gimin ia bilsiode Meghalaya a·dokni chatro chatrirangko CUET porikkaoniko watchina gita a·dok sorkari UGC-ko mol·molataha ine Sukrobar salo a·dokni Chief Minister Conrad K Sangma parakataha.
“CUET porikkani bidingo tanggitik u·iataniko man·soe chatro chatrirang bang·batan an·tangtangko tarisamsotokna man·jaha, uni gimin chinga sorkarini gita ia bilsiode a·dokni chatro chatrirangko ia porikkaoniko watchina mol·molatahachim. Indiba ian a·song gimikon ong·engani gimin a·dokni chatro chatrirangba iana tarie dongna gita nangtokenga,” ine Sangma aganaha.
CUET porikkana form-rangko gapatani bon·kamgipa tarikara May 6 tarikon ong·engahani gimin college-rango admission ra·na sienggipa pilak chatro chatrirangkon somoi gita form-rangko gapatchinaba Sangma didiataha.
“CUET porikkani bidingo UGC-ni u·iatani tanggitiksa ong·ahani gimin Meghalaya a·doknade tarikko ra·dodapatchina gitaba chinga mol·molatahachim indiba iana senge dongaigija chatro chatrirang pilakan May 6 tarikni gisepon form-rangko gapatchina anga mol·molatenga,” ine Chief Minister aganaha.
Chief Minister-ni aganani gitade, Meghalaya a·doko bang·bata college-rangan NEHU central university-ni ning·osa ong·ani gimin admission ra·na nangenggipa chatro chatri pilakan CUET porikkako sena nangchongmotenga.
Indake ong·engon, CUET porikkako seanio chatro chatrirang maming neng·nikanirangko man·jana gita a·dok sorkari, a·dokni pilak dam 12 a·jarangon CUET centre-rangko kulina UGC baksa agangrikataha ineba Chief Minister parakataha.
University Grants Commission (UGC)-ni ge·etanio pangchake Meghalaya a·dokoba North Eastern Hill University (NEHU)-ni gita university-ni ning·o donggipa dingtang dingtang college-rango under graduate course-rangna ia 2022-23 bilsionin Common University Entrance Test (CUET) 2022-ko a·bachengatna tik ka·ahachim.
