TURA: Dadenggre civil sub-division-ni ning·o donggipa dingtang dingtang biaprango bijoliko name on·jaenga ine Garo Students Union (GSU) Western Zone (North) Dadenggre, suk ong·gijaniko parakataha.
GSU WZN Dadenggre-ni president Tengsan M Marak-ni parakatani gitade, batanggimin jarangonin Dadenggre jolrango bijoliko name man·tokjaengachim aro iani a·selan da·o porikkarangko seenggipa chatro chatrirang neng·nikanirangko chagrongna nangtokengachim.
Dadenggre jolrango bijoliko name man·jaengani a·sel chatro chatrirangsan ong·aigija bijolio pangchakna nangenggipa dingtang dingtang dokkanrangba nangchakeaniko man·tokenga ineba GSU WZN Dadenggre-ni president parakataha.
Dadenggre-o donggipa MePDCL-ni kamna suk ong·gijaniko parakatengon, ia jolo bijoli sia changantian uamang, Rongkhon sub-station-kosa dos galrongenga ine GSU parakataha.
“FeDCO-o kam ka·giparang baksa Dadenggre-ni MePDCL-o kam ka·enggipa manderangba re·rurae nirok sandianirangko dakna nanga. FeDCO-o kam ka·giparangde training-rangko man·pagiparang ong·ja indiba MePDCL-o kam ka·giparangde gimikan training dongmangimin manderangsa ong·achim. Uni gimin MePDCL-o kam ka·enggiparangba FeDCO-o kam ka·enggiparang baksa Dadenggre-o donggipa manderangna nambate bijoliko on·na kam ka·na nanga,” ine GSU WZN Dadenggre-ni president parakataha.
