Tura: Garo Hills a·jao mikka-balwa ta·rakani a·sel neng·nikako chagrongtokna nangenga, changsatai, mni Sukroba walo mikka balwa ta·rakangani a·sel North Garo Hills district-o nok-jamrang nosto ong·aha aro bolrang pangpikaha.
Jolni manderangni parakatani gitade, April 29 tariko atam 7 bajioni mikka-balwa jimaha. Konta 3 somoina joljol mikka balwa ta·rakani a·sel nok-jamrangsan ong·aigija ge·a-gamanirangba nosto ong·tokaha.
Thakurbilla, Borjhora, Fakirmara, Namapara Sarapara aro gipin biaprango mikka-balwa bilongangaha. Te·rik bipang aro gue bol bipangrang nosto ong·tokaha.
Iana skang April 28 tarikoba mikka-balwa jimani a·sel komibeoba te 21 nok-jamrang nosto ong·ani a·sel sak 65 manderang neng·nikako man·tokaha. Chiram Kama, Chiram Aga aro Rangolchiring jolrang a·sel ong·a bilongaha. NGH district administration, mikka jimani a·sel ge·a-gamanio badita gimaani sokaha iako sandienga.
Duko ga·akgiparangna Gratuitous Relief (GR)-ni gita mirong dal, kari torangko on·aha.South West Garo Hills-ni bang·a songrangoba Sukrobar walo mikka balwa jimani a·sel manderang neng·nikako man·tokaha. Zikzak C&RD Block-ni ning·o ga·akgipa bang·a songrangon mikka bilonge aro balwa ta·rakani a·sel bang·a nok-jamrang nosto ong·tokaha, ramarang aro ge·a gamanirang nosto ong·tokaha. Bang·a nokrangni nokking balpakangaha.
