SHILLONG: Shillong songjinmaoni Mawiong-o donggipa Inter State Bus Terminus (ISBT)-ona manderangni re·ruraanio neng·nikanirangko sorkari namatna gita cholrangko sandiengoba da·o dipet cholrangko man·kujaenga.
Adita salrangna skangsan, a·dokni Transport Minister Dasakhiatbha Lamare-ba kobor ra·timgiparang baksa agangrikengon, Shillong songjinmaoni Mawiong-o donggipa ISBT-ona taxi salgiparangni manderangko salruraanio sorkaride mamingkoba dakna man·jawa ine parakatahachim.
Da·o dipet, Shillong songjinmaoni ISBT-ona kilometre 10-mangni rama dongani gimin taxi salgiparangba manderangoniko gong 400-oni gong 800-mangona ra·engachim ine nikna man·a.
Taxi salgiparangna Transport department-ni gita damrangko tik ka·e dongenchimoba, ISBT-ona manderangko salruraanio damrangko bate ra·anio sorkarini gitade taxi salgiparangni kosako mamingkoba dakna bil dongja ineba Transport Minister parakataha.
“Taxi salgiparang gimikande manderangoniko indita ra·enga ong·ja aro mitamrangsan cholko ra·e manderangoniko iandake tangka ra·enga,” ine Lamare aganaha.
Iani bidingo dingtang dingtang dolrang badi ka·doengani gimin ua manderangni neng·nikanirangko namatna gita cholrangko sandienga ineba Transport Minister parakataha.
“Manderangni neng·nikanirangko chingni department, namatna jotton ka·enga,” ine Lamare aganaha.
