SHILLONG: Jowai jilao km 32-mang bakrogipa ramako World Bank project-ni ning·o taridaptaigen.
Ua project-na tender on·ani gimin u·iataniko on·aha aro ramako jilani biaprango ramarangko taridaptaigen ine PWD-ni official u·iataha.
Minggipin, Department, Umsning-Jagiroad ramanaba tender galchina u·iataniko on·aha aro ua ramako taria man·jokode uan jemangan Assam-ona songrena nanga uandakgipa manderangna dal·begipa namgni ong·gnok.
Indake ong·engon Ishyrwat-Mawpdang dal·begipa rama, New Shilong Township (NST) matchotengaha ineba official u·iataha.
“Da·o mangmang ramani chinrangkosan nangaiaha aro ua kamrangko mikka-wachi kari somai ja·mano ka·anggen,” official aganaha.
Ramani bon·kamgipa kilometer bonga rama dilsasan ong·kuenga aro ramako double lane dakskana department che·em che·em ramani report gita kamko ka·enga aro changsa ua rama matchotjokode Shillong songjinma aro Ribhoi-ni gisepo re·a-doanio namen nambatgnok.
Indake ong·engon New Shillong Township-o tangka-paisani chol-ramani kamrang ga·suenga aro ru·utgija sal somaio two lane ramade neng·nikaniko namatna chu·ongja aro gari bolbri changbanggipa rama ba four lane ramako nangenga ine bang·a manderang aganenga.
Maibakai uano mande songdonggipa a·jolrang bang·en dongaonin ramako four lane dakskana namen neng·ani ong·gnok ine PWD official aganaha.
