TURA: Tura Don Bosco College-ni final year chatro chatrirangna Sombar salo, career counselling program-ko ong·atangaha.
Tura Don Bosco College-o poraie da·o dingtang dingtang university-rango Master degree-rangko dakna sienggipa chatro chatrirangna, ia program-ko ong·atangaha.
Ia program-ko ong·atanio chatro chatrirangna agan-talate on·anggipa manderangara, Guwahati-o donggipa Assam Royal Global University-ni Deputy Manager (Branding & Communication) Kula Prasad Bora aro apsan university-ni Assistant Manager (Branding & Communication) Akshay Kanta Sharma ong·a.
Don Bosco College-o poraigipa chatro chatrirangna mikkangchi nambata janggi tangani gadangko on·na man·a gita ia college, Guwahati-ni Tata Institute of Social Science (TISS), Kazirang University, Pune Institute of Business Management (PIBM), Don Bosco Job Placement Network (DBJPN), Assam Royal Global University aro District Administration baksa jakkandile, chatro chatrirangna iandakgipa program-rangko ong·atenga.
Ia career counselling program-ko ong·atanio Tura Don Bosco College-ni Principal, jinmana aganprakengon, mikkangchi ia college-ni chatro chatrirangna, kamni interview-rangko mikkangpaani gimin agan-talate on·anirangkoba dakanggen aro aviation industry-rangni gitaba, ground staff aro cabin crew-na dingtangmancha campus recruitment-ko dakanggen ine parakangaha.
Ia career counselling program-ko ong·atanio graduate ong·ani ja·man maidakgipa line-rangko ra·na man·gen, uarangni gimin skigiparang agan-talate on·angaha.
Chatro chatrirangni namgnina dingtangmancha Don Bosco College aro Royal Global University-ni gisepo MoU-o soi ka·grikgen ineba ia tom·anio tik ka·e donangaha. Ia songgigrikaniko dakanichi Tura Don Bosco College-o Royal Global University-ni incubation centre-ko man·na gita dakchakaniba ong·gen.
