Tangka paisarang dongjani a·sel Resubelpara civil hospital-ko matchotna man·kujaenga

TURA: North Garo Hills a·jao songdongenggipa manderangni namgnina Resubelpara-o 100 bedded civil hospital-ko rikna a·bachengatahaoba re·anggipa bilsionin tangka paisarang dongjani a·sel ia hospital-ko matchotgija donchipna nangengaha ine Rongrong MDC Rinaldo K Sangma parakatenba, ia hospital-ko matchote rikna man·na gita tangka paisarangko chame on·atchina gita a·dokni Chief Minister Conrad K Sangma-ko mol·molataha.
Rongrong MDC-ni parakatani gitade, ia 100 bedded civil hospital-ko 2019 bilsini March jaonin rikna a·bachengahachim indiba uni ja·man sorkarioni ia hospital-ko rikna gita tangka paisarangko chamdape on·a dongjae re·anggipa bilsionin ia hospital-ko rikenggipa contractor-rang kamko dontongatna nangao ga·akahachim.
“Da·o dipet Resubelpara-o community health centre (CHC) damsasan dongaia aro ia health centre-on pilak sagiparangkon sanna gita nangenga. Ia CHC-o chu·onga gita sanna banani cholrang dongjae bi·sa an·paknagipa me·chikrangko aro dingtang dingtang sagiparangkoba bang·a changon Tura-ona ba Goalpara-rangonasa ra·angna nangtokenga. An·o donggipa aro bilonge sagipa manderangko chel·a biapona ra·na nanganiara namen kenchakna nanganiba ong·enga, uni gimin Resubelpara-o ia civil hospital-ko matchotate on·na nangchongmotenga,” ine Sangma parakataha.
Rongrong MDC-ni parakatani gitade, ia hospital-ko rikani kamrangko dontongatani gimin uamang am·sandie nion ia hospital-ko rikenggipa contractor-na da·onan gong·sakoba on·kujaengani gimin kamrangko dontongatna nangao ga·akaha ine uamang ma·sina man·aha.
“Ia 100 bedded civil hospital-ko ta·raken matchotatna man·genchimode ian North Garo Hills a·jani manderangna aro mongsongbate songadam nokadamrangoni sanna banna re·baenggipa manderangna bang·a dakchakani ong·gnokchim. Uni gimin North Garo Hills a·jao songdongenggipa manderangni namgnina anga, ia hospital-ko ta·rake matchotatna gita tangka paisarangko chamdape on·china mol·molatenga,” ine Sangma, Chief Minister-na seatgipa chittio janapataha.