TURA: West Garo Hills a·jana da·o East Garo Hills a·jani Deputy Commissioner ong·enggipa Swapnil Tembe-ko gital Deputy Commissioner dake sorkari songe on·ataha.
Sukrobar salo, Meghalaya a·dokni mitam IAS aro MCS officer-rangna kamrangko gital dake sorkari sualatpiltaiaha aro uandaken kamrangko sualpiltaianio East Garo Hills a·jani Deputy Commissioner Swapnil Tembe-ko West Garo Hills a·jani Deputy Commissioner-na songe on·atskaaha.
Meghalaya sorkarini ning·o donggipa Personnel & AR (A) Department-ni Commissioner & Secretary R Lyngdoh-ni parakatani gitade, East Garo Hills a·jani Deputy Commissioner Swapnil Tembe, West Garo Hills a·jani DC ong·skagnok aro West Garo Hills a·jani Deputy Commissioner Ram Singh, Shillong-o Finance Department-ni Secretary ong·skagnok.
Lyngdoh-ni u·iatani gitade, Finance aro Rural Development department-ni Joint Secretary ong·enggipa Ramakrishna Chitturi, Planning department-niba Joint Secretary ong·e kamko ka·anggnok.
Indake ong·engon, East Khasi Hills a·jani Sub-Divisional Officer (Sardar) Mitali Chandra-koba Health & Family Welfare department-ni Under Secretary baksana National Health Mission-ni Additional Mission Director aro Tourism department-ni ning·o donggipa Meghalayan Age Limited (MAL)-ni Director dake sorkari songe on·ataha.
East Garo Hills a·jani Additional Deputy Commissioner Levenstone C Marak, an·tangni kam baksana East Garo Hills a·jani Deputy Commissioner ong·eba kamko ka·angskagen ine Personnel & AR (A) Department-ni Commissioner & Secretary parakataha.
