TURA: Tura jillako nitobatatna gita footpath ba manderangni re·chakgipa ramarango pul ge·na tarigipa biaprangko manderang jabol galchakna dongipa biap ine ma·sisrettokengani a·sel da·o ia biaprangko taria matchotkujaengoba ia biaprango jabol gale donanirangko nikna man·skaengachim.
Tura-ni bang·bata biaprangon footpath-rango pul ge·chakna gita kok dake cement-chi tarie donanirangko nikna man·enga aro ia biaprangara pulrangko ge·na gitasa tariahaoba manderang ia biaprangko ma·sisretenba jabolrangkosa galskaengachim.
Tura Ringrey-o dokkan dakgipa manderangni aganani gitade, ia biaprango jabolrangko galchippile gale donako nikna man·enga indiba ia jabolrangko Tura Municipal Board (TMB)-ni gita galskakujaengani a·sel ia biaprangara namen nitogijani ong·skaengahachim.
Ia biaprango manderang jabolrangko galengani gimin da·o ia kok dake cement-chi tarigipa biaprangko katipe donatchengskaaha ine kobor on·aha.
Tura Municipal Board-oni koborko on·ani gitade, ia sal somoirango jabol galani bewalko dingtangatahani gimin jabol galgipa manderang, somoi gitasan dingtang dingtang gittimrangona re·ange jabolrangko sale galenga aro TMB-ni garirang sokangani somoiosa manderang an·tangtangni jabolrangko chimonge ia garirango on·atskana nangengahachim.
Jabolrangko ramasamrango galjachina aro TMB-ni garirang sokangahaosa jabolrangko chimonge on·atchina gitana TMB u·iatahachim.
Indake ong·engon, manderangni re·chakgipa rama ba footpath-rango pul ge·chakna gita biapko tariani a·sel manderang re·ruraanirango neng·nikanirangko man·skana nangengaha ine mitam manderang suk ong·gijaniko parakatskaaha.
