Garo Hills-o niam gri bading chiwalgiparangko champengchina Merchants Association didia

TURA: Garo Hills-ni dingtang dingtang biaprango Trading for Non Tribals (TNT) licence gri bading chiwalenggipa non-Tribal-rangko aro gipin biaprangoni re·bae bostu paljojogipa manderangko sandienba champengchina gita All Garo Hills Merchants Association (AGHMA), a·dokni Chief Minister Conrad K Sangma aro Garo Hills Autonomous District Council (GHADC)-ni dilgiparangko didiangaha.
Iani bidingo association-ni dilgiparang, GHADC-ni dilgiparangna aro a·dokni Chief Minister Conrad Sangma-koba gronge dingtangmancha memorandum-ko on·angaha.
AGHMA-ni president Thoseng Cheba Sangma-ni u·iatani gitade, Garo Hills-ona gipin biaprangoni non-Tribal-rang re·bae, niam gri bading chiwale cha·tokenga aro ia manderang, Garo Hills-ni songo nokona re·bae bading chiwalengani a·selan Garo Hills-ni bading chiwale cha·paenggipa manderang cholina gita man·tokjaengachim.
“A·chik a·songni manderang, a·songtangon bading chiwale cha·anio tang·dopana man·na gita miksonganiosa chinga ia association-ko bikotaha aro chinga ia association-ni gita, gipin biaprangoni re·bae Garo Hills-o niam gri bading chiwale cha·enggiparangko champengna jotton ka·enga. Gipin biaprangoni Garo Hills-ona ma·manti bosturangko aro bolam biterangko bading chiwale cha·na re·baenggipa mitam manderang, Garo Hills-o songdongkamna jotton ka·ronga aro bang·a changon A·chikrangko ga·cheppilna jotton ka·ronga,” ine AGHMA-ni president parakatenba, mikkangchi iandake Garo Hills-o niam gri bading chiwale cha·na re·baenggipa manderang mikrakbate sandichina aro iandakgipa manderangko Garo Hills-o bading chiwale cha·na on·jachina Chief Minister-ko aro GHADC-ni dilgiparangko didiataha.
AGHMA-ni parakatani gitade, uamang Garo Hills-o non-Tribal-rangni bading chiwale cha·anikode champengjaenga indiba Garo Hills-o bading chiwale cha·engon, Garo Hills-ni niamrangko ja·rike bading chiwale cha·anikosa nangnikenga.
“Gipin biaprangoni re·bae Garo Hills-o bading chiwalenggiparang TNT gnangsa bading chiwale cha·china aro bazar antirango bading chiwalna re·baengon, sal nana skang re·bajachina aro sal napna skangan songtangtangona re·angpilchina,” ine AGHMA-ni president parakataha.