SHILLONG: Meghalaya a·dokni skotong Shillong songjinmako man·chape salgro salaramni pilak skotong songjinmarangkon da·o adita bilsirangni gisepon rel ramarangchi nangdimatna gita ma·mong sorkari miksongengon, a·doko ma·mong sorkari maikoba dakna miksongenga ong·ode uko a·dok sorkari champengna man·ja indiba apsan daken a·doko songdongenggipa manderang maikoba nangnikjaenga ong·ode uko ma·mong sorkariba dakdrana man·jawa ine Budbar salo, a·dokni Transport Minister Dasakhiatbha Lamare parakataha.
Meghalaya a·doko aro mongsongbate Khasi-Jaintia-Ri Bhoi a·jarango rel gari ra·napbaaniko jegaltokengoba, salgro salaram a·dokni pilak skotong songjinmarangkon rel ramarangchi nangdimeatgnok ine changni chang ma·mong sorkari aganengani gimin a·dokni Transport Minister, ia kattarangko aganaha.
Meghalaya a·dokona niam gri napsrukanirangko champengna gita rakgipa niamrangko ra·gatchenggija rel garirangko ra·napbagenchimode niam gri napsrukanirang bilongbatgnok ine dingtang dingtang dolrang, Ri Bhoi-Khasi Hills aro Jaintia Hills a·jarango rel gari ra·napbaaniko raken jegalsotokengachim.
Indake ong·engon, a·doko songdongenggipa manderangan iako nangnikjaenga ong·ode, uamang sorkarini gita agangriktaina nangenga ine Lamare parakataha.
“Manderangni nangnikanirangko anga nichengna nanggen indiba manderang, rel gari ra·napbaaniko nangnikjaenga ong·ode chinga agangriktaina nanggen,” ine Minister aganaha.
2017 bilsionin Tetelia-Byrnihat railway project bon·chongdikahachim aro untalan Ri Bhoi aro Khasi Hills a·jarangona rel ramarangko tariangna man·kujaengachim ine nikna man·a.
