SHILLONG: New Shillong Township-ni Mawdiangdiang-o rikenggipa gital Assembly building-ni protchong be·gruanina Meghalaya a·dokni Lok Janshakti Party (LJP) dolba a·dok sorkariko matnangatenba, ian sorkarini tangka paisa jakkalsretaniko mesokani ong·enga ine parakataha.
Meghalaya a·doko (R) LJP-ni president ong·e kamko ka·enggipa Jamil Ahmed-ni parakatani gitade, a·doko chadamberang kamrangko ka·e cha·na maming cholrang dongjaengaha, manderangni nangchongmotgipa bosturangba dam rakbatroroenga aro iani a·selan man·e cha·giparangsa man·e cha·batroroenga indiba kangal cholgrirangde kangalsa ong·batroroengahachim.
“Salo kajira ka·e cha·paenggipa manderangde maikai nokdangtangtangko alduenga an·ching pilakan ma·sina man·enga. Uamangni nokdangko alduaniara namen rakbegipa kam ong·engaha. Meghalaya a·doko economy-ba tang·onroroangengaha indiba rasong gnanggipa manderangde man·e cha·skaengaha. Iandakgipa neng·nikanirangko an·ching chansokpiljaenga indiba ia sorkari manderangni neng·nikanirangko namatna maming kamkon ka·jaenga,” ine Ahmed parakataha.
Adita salrangna skang mikka balwarang ta·rakangani somoio ua Mawkyrwat-ona re·ange nieahachim aro ua biapo adita nok-jamrangni nosto ong·anirangko nikbana man·aha ineba (R) LJP-ni president parakataha.
“Mawkyrwat songona re·ange anga uamangna sorkari minister ba official-rangna dakchakanirangko on·engama ine songni dilgiparango sing·aha. Indiba rasong gribee sorkarioni uamangna maming dakchakanirang dongja ine ma·sibana man·aha. A·dokni PHE Minister an·tangan Mawkyrwat constituency-ni MLA-ba ong·engachim indiba ia constituency-ni manderang ringani chirangkon man·jaenga. Iani bidingo LJP dolni gita, a·dok sorkarini Chief Secretary-na sedoatenba, ia songo neng·nikanirangko man·enggipa manderangna dakchakanirangko on·china didiataha. Chingni seatgipa chittina sorkari ja·kurangko de·ama de·kujama chinga ma·sikujaenga,” ine Ahmed parakataha.