TURA: Tura-ni Reservegittim aro Sillanggre gittimo songdongenggipa manderangna a·a pattarangko on·gen ine pa·sikenba GHADC-ni bimingo tangka gile ra·aha ine Tura-ni MDC Bernard N Marak matnangenba, gittimo donggipa development committee-ni adita dilgiparangni kosako FIR ka·doangaha.
“GHADC-de darangkoba tangka gile ra·na bilko on·na man·ja aro je gamna nangakoba office-osa challan gita gamna nanga. Ia manderang, nokdangprakon gong 2500-oni gong 5000-mangona kingking tangkarangko gile ra·aha aro ian niam gri tangka gildrae ra·anisa ong·aha,” ine Tura-ni MDC, re·anggipa jao Araimile outpost-ni officer-in-charge-na FIR ka·doanggipao parakataha.
FIR ka·doanggipao ua, development committee-ni membor sakbriko, chong·motan Monjing K Sangma, Peldit Ch Marak, Leving A Sangma aro Nongjing K Sangma-ko dos donggiparang ineba matnangataha.
Marak-ni FIR-o parakani gitade, ia manderang, gittimo songdongenggipa mitam nokdangrangko tangka paisa gamjagenchimode an·tangtangni a·arangko gimaatgnok aro gittimo songdong a·chana man·jawa ine ka·mikkenatahachim.
Tangka gildrae ra·a man·gipa nokdangrangna tangka paisarangko on·pilchina aro ia manderangni kosako rakgipa ja·kurangko de·china didiatengon, ia a·arang jenan ia manderang tangka paisarangko gile ra·ahachim, district court-o mokordoma ka·a man·gipa a·a ong·e da·o dipet kacharini ning·osa ong·kuengachim indiba Marbalione R Sangma minggipa me·chik saksa, Nokma document gri gital pattako tarie ra·aha ine Tura MDC matnangataha.
Iani bidingo sandirokenba, rakgipa ja·kurangko de·china gitaba Marak didiataha.
