SHILLONG: All Jaintia Mid Day Meal Workers Union (AJMDMWU)-ni dabienga gita da·o dipet mid day meal (MDM) worker-rangni dormahako gong 1000-oniko gong 5000-ona bariatna gita sorkario tangka paisarang dongkujaenga ine Meghalaya a·dokni Social Welfare Minister Kyrmen Shylla parakataha.
“MDM worker-rangni dormaharangko bariatna gita chinga kusi ong·begenchim indiba a·doko tangka paisa donganikoba chinga nikna gita nanga maina uamangni dormahako bariatanio bang·bea tangka paisarangko nangdapgen,” ine Shylla aganaha.
Da·o dipet sorkario tangka paisarang dongjani gimin uamang skatang ja·kuko de·na man·jawa ine talataniko on·angengon, “Chinga mid day meal worker-rangko duk chakatnade sikja beben, indiba uamang sorkarini neng·nikanirangkoba ma·sichakskana nanga,” ine Social Welfare Minister parakataha.
Iani bidingo ua Chief Minister Conrad K Sangma baksa agangrike ninade man·aigen ineba Shylla agantaiaha.
Adita salrangna skangsan, ma·mongni Union Education, Skill Development aro Entrepreneurship Minister Dharmendra Pradhan-ni a·dokona re·baani somoio ua Mid Day Meal (MDM) worker-rangni nangnikanirangko chu·sokatna gita cholrangko sandigen ine ku·rachakaniko on·angahachim.
SSA skulrango skigiparangni aro MDM worker-rangni neng·nikanirangko Meghalaya a·dokni Education Minister Lahkmen Rymbui, uko grongani somoion agan-janapaha aro ua skigiparangni aro MDM worker-rangni nangnikanirangko chu·sokate on·na cholrangko sandigen ine Union Minister parakatahachim.