TURA: Ia 2022 bilsini Secondary School Leaving Certificate (SSLC) porikkao Top 20-ni skanggipa biapko man·e chu·sokanggipa Dalu Woodland School-ni chatro Arghadeep Saha, an·tangni chu·sokgipa ong·anina Nokgipa Isolko aro an·tangni ma·a paakoba mittelpilangaha.
Uni porikkao chu·sokgipa ong·ani bidingo kobor ra·timgipa manderang baksa ku·siliting gita agangrikatengon, ua ia porikkao name dakna ka·dongsoengoba iandake skanggipa gadangko man·nade maming ka·dongsoanirang dongsrangjachim ine Arghadeep, Guwahati-oni parakataha.
Uni parakatani gitade, da·o ua Guwahati songjinmao poraiengahachim.
An·tangni chu·sokgipa ong·anina Nokgipa Isolko aro ma·gipa pagipako mittelpilatengon, uni pilak kamrangon uni ma·a paa una nanga dakchakanirangko on·aha aro COVID-19 sajinmani somoio skulrangko chipani somoioba ua konta 12-14-mangna poraina gita somoiko on·aha ine Arghadeep parakataha.
“Lockdown-ni somoirango skulrangko chipe donna nangahani a·sel chinga bang·en neng·nikanirangko chagrongna nangaha indiba chingni skigiparang, chingna online gita chingni pilak nanga lesson-rangko somoi gitan on·aha aro iani gimin angni skigiparangkoba namen mittelpilna ska,” ine Arghadeep parakataha.
An·tangni porikkana tarisamsoaniko talatangengon, ua porikkana agre chanchidugajaha indiba somoi gita poraianikosa ranta ka·aiaha ine Arghadeep parakataha.
Porikkana tarisamsoani mai dakgipa ra·biani aro neng·nikanirangko chagrongna nangaha ine sing·on, Dalu jolrango pangnan bijoli sirongani a·sel poraigipa bi·sarang neng·nikanirangko chagrongna nanga aro uaba apsan daken neng·nikanirangko chagrongaha indiba ua ia neng·nikanichi an·tangni chu·sokgipa ong·aniko salrikna on·jaha ine Arghadeep parakataha.
Mikkangchi ua NEET porikkako see chu·sokgipa ong·na miksonganirang donga ineba ia bilsini SSLC porikkao skanggipa biapko man·gipa chatro Arghadeep aganaha.
Ia apsan Dalu Woodland School-onin sakgipin chatro Biambong A Sangma-ba Top 20-ni 11-gipa biapo chu·sokgipa ong·aha aro uandaken ia skulni headmaster aro skigiparang, kusi ong·aniko mesokna gita ia skulko salgni chutti wataha ine kobor on·aha.
