TURA: Meghalaya a·dokni SSA skulrango skigiparang, February jaonin jabrini dormaharangko man·kujaengani gimin, ia jabrini dormaharangko re·baenggipa June 22 tarikni gisepon on·china dabie, Mongolbar salo All Garo Hills SSA School Teachers Association (AGHSSASTA), a·dokni Chief Minister Conrad Sangma-na sedoataha.
AGHSSASTA-ni parakatani gitade, SSA skulrango skigiparangna somoi gita dormaharangko on·jaengani a·sel skigiparang neng·nikanirangko chagrongna nangtokengani gimin batanggimin somoirangoba uamang changni chang a·dokni Education Minister-na memorandum-rangko on·atahachim indiba da·ona kingkingan skigiparangna somoi gita dormaharangko on·na gita gisik nangjaengachim.
“Mitam skigiparangni dedrangrangde da·o SSLC aro HSSLC porikkarangko pass ka·e chubata gadangrango poraina gita admission-ko ra·na nangtokpaengachim aro mitamrangde da·o jadokni porikkarangko sena nange an·tangtangni skul fee-rangko matchote gamna nangtokskaengachim. Indake ong·engon, chingna da·o jabri ong·pile dormaharangko on·kujaengani a·selan chingni dedrangrangde college-rango admission ra·pana aro skul fee-rangko gampana chol ong·tokkujaenga. Iarangsan ong·aigija indita jani dormaharangko man·tokjaenba chinga an·tangtangni nokdangrangko chalaianio bang·en neng·nikanirangko chagrongna nangtokengaha,” ine AGHSSASTA-ni dilgiparang, Chief Minister-na seatgipa chittio parakataha.
SSA skulrango skigiparangna bangki dongenggipa jabrini dormaharangko re·baenggipa June 22 tarikni gisepo chu·gimik on·jagenchimode skigiparang, kamtangtangko dontongate sorkarini kosako jingjengatana agre gipin cholrang dongjawaha ineba AGHSSASTA parakataha.