Tura Bypass -ko tariani bidingo SWGH-ni District Administration chanchirimdilanga

AMPATI: NH-51 ramani km 95+00-oni km 100+00-ona 2-Lane Tura Bypass ramako EPC mode-o tariani bidingo chanchirimna gita Bristibar salo, South West Garo Hills a·jani District Administration, NHIDCL aro dingtang dingtang dolrang baksa tom·aniko Ampati-ni DRDA Conference Hall-o ong·atangaha.
Ia Tura Bypass ramako tarianio Ballonggre, Upper Damalgre, Rongbakgre aro Gambegre songni a·arangko ra·na nangnaba gnang ine niksamsoengani gimin ia tom·anio ia songrangni Nokmarang aro gipin dilgiparangkoba okamchimonge, uamangni agananirangkoba South West Garo Hills a·jani Deputy Commissioner SK Marak, knatime ra·angaha.
Ia ramana a·arangko ra·anio saniba bagan barirangko man·chapgenchimode uarangna Revenue Branch-ni hisapani gita compensation-rangko on·skagen ine ku·rachakaniko on·angengon, iani bidingo songni manderangna aro a·a nokgiparangna talatanirangko on·enba, an·tangtangni a·arangko sorkarina pakwate on·na didichina gita songni Nokmarangko, Deputy Commissioner mol·molataha.
Ia National Highway-na salgimin biaprango ga·akgipa a·a nokgiparangko biming segatenba, mikkangchi a·a nokgiparang baksa tom·aniko ong·atna skangba District Administration-na u·iatskachina gita ua NHIDCL-koba ge·etangaha.
National Highway-na biapko tik ka·na skang, songni manderang baksa agangrikchengchina gita songni dilgiparang didiahani gimin ia tom·anio Rerapara C&RD Block-ni BDO RZD Shira, mikkangchi maming ma·sisretanirang aro golmalrang dongjana gita ia songrango donggipa manderangni nangnikanirangko knachakchina NHIDCL-ko didiangaha.
Ia tom·anio Tura Bypass-na Detailed Project Report (DPR)-ko tarina gita NHIDCL-ni songe on·gipa G-Engineering Advisory Services Pvt Ltd-ni Highway Engineer Kumar Shanu-ba talataniko on·angskaengon, ia ramana gipin biaprangoni manderangsa bang·bea koros ong·e survey-ko ka·e nambatgipa alignment-ko tariahani gimin mande sakantini nangnikani gita da·o alignment-ko tanggitikde dingtangatna man·jawaha ine parakangskaaha.
Tura jillao gital tarina sienggipa Tura Bypass ramara, gital parakatgipa NH-127B-oni a·bachenge Jenggitchakgre songo NH-217-ni km 108.750-o bon·ena gita siengachim.
Ia ramana South West Garo Hills a·jani kosako janapgimin songrang, chong·motan Ballonggre, Upper Damalgre, Rongbakgre aro Gambegre songrangonikoba km 6.350 bakroe man·chapengachim.