SHILLONG: Meghalaya a·doko mikkarang waanganichi baditana kingking skulrang nangchakeaniko aro nosto ka·ako man·aha, uko ma·sie ra·na gita sorkari da·o am·sandianirangko dakengaha ine a·dokni Education Minister Lahkmen Rymbui parakataha.
Education Minister-ni parakatani gitade, a·jatangtango badita dam skulrang mikka waanichi nosto ka·ako man·ahachim, uarangko deputy commissioner-rang am·sandienga
“Mikkarang jime waanganio badita dam skulrang nangchakeaniko aro nosto ka·ako man·angaha, uarangko sandichina a·jatangtangni deputy commissioner-rangna ge·etaniko on·atmanaha aro deputy commissioner-rang am·sandienba, sorkarina report-ko on·gen,” ine Bristibar salo, Rymbui parakataha.
Meghalaya a·doko mikkarang dontonggija waanganichi pilak biaprangon nangchakeaniko man·angaha indiba obostarang biapni kri dingtanggrika ineba Rymbui parakataha.
Education Minister-ni parakatani gitade, ia chango mikkarang batanggimin bilsirangona bate jimbate waangahani a·sel skul nokrangba bang·a biaprangon nosto ka·ako man·tokaha.
“Uni gimin chinga baditana kingking skulrang nosto ka·ako man·ahachim, uarangko am·sandie nanga gita kamko ka·anggen. Mikkangchide iandakgipa obostarang ong·taijawa ine anga ka·dongenga,” ine Rymbui aganaha.
