SHILLONG: Ia bilsini gisepon Meghalaya a·doko sokachakna sienggipa North East Olympic Games-na tangka paisarangko dakchake on·atchina gita a·dokni Sports & Youth Affairs Minister Banteidor Lyngdoh, ma·mong sorkariko mol·molataha.
“Da·o dipet ia kal·susaaniko sokachakna gita a·dok sorkari, an·tangtangni tangka paisarangkon jakkalenga indiba ia dal·begipa kal·susaaniko sokachakna gita chinga ma·mong sorkarini dakchakaniko nangenga,” ine Sukrobar salo, salgnina Gujarat a·dokni Kevadia-o ong·atenggipa Sports & Youth Affairs Minister-rangni tom·bimonganio Lyngdoh aganaha.
Ia salgnina ong·atenggipa national conference-ko Union Youth Affairs & Sports Minister Anurag Singh Thakur dilangahachim.
Meghalaya a·doko da·o dipet mongsonggipa kal·susaani biaprang a·dokni skotong Shillong songjinmaosa ong·engani gimin pilak district headquarter-rangon, Khelo India Centre of Excellence-ko kulina gita a·dok sorkariko dakchakchinaba ua ma·mong sorkariko didiangaha.
Sports Minister-ni aganani gitade, iandake kal·susachakgipa biaprangko rike on·aniara a·dokni diltugipa biaprangoba kal·na changgipa manderangko ong·katatna dakchakani ong·gen.
Meghalaya a·dokara a·briarigipa biap ong·ani gimin iandakgipa biaprangko rikna gita tangka paisarangko bang·bate chame on·na nanga ineba Lyngdoh aganaha.
“Khelo India Centre of Excellence-ko rikna gong kror 5 tangkarangko chamaniara chu·ongjaenga maina Delhi-o tarigipa DPR aro Meghalaya a·doko ia biapko rikna gita tangka paisa chamaniara melijaenga,” ine Meghalaya a·dokni Sports & Youth Affairs Minister parakataha.
Meghalaya a·dokni dingtang dingtang biaprango donggipa youth hostel-rangko taridapna nangengani giminba ia tom·anio Lyngdoh, ma·mong sorkarina janape on·angaha.
