SHILLONG: National People’s Party (NPP)-chi dilenggipa Meghalaya Democratic Alliance (MDA) sorkariara Meghalaya a·dokni manderangko cha·bokenggipa sorkarisa ong·a ine Budbar salo, All India Trinamool Congress (AITC)-ni national general secretary Abhishek Banerjee matnangatenba, a·dokni Chief Minister Conrad Sangma-ko ‘Conman’ mingchina aro MDA-ko ‘My Development Alliance’ mingskachina aganangaha.
AITC-ni national general secretary Abhishek Banerjee, skanggipa changna Budbar salo Shillong songjinmaona re·baaha aro uni sokbaani ja·man AITC-ni tom·bimonganiko Shillong songjinmani State Central Library-o ong·atanio ua ia kattarangko aganangaha.
Banerjee-ni Shillong songjinmaona sokbaanio uko Umroi-ni AITC MLA George Lyngdoh, Rangsakona-ni AITC MLA Zenith Sangma aro AITC-ni dingtang dingtang dilgiparang, Umroi airport-o rimchaksoaha.
Shillong songjinmaona sokbaani ja·man AITC-ni national general secretary, Lachumiere-o donggipa AITC office-ko kulie on·angaha aro ia office-ko kulie on·angani somoio, Opposition dolni dilgipa Mukul Sangma, AITC-ni state president Charles Pynrope aro gipin dilgiparangba dongpae bak ra·angaha.
State Central Library-o AITC-ni tom·bimonganiko ong·atanio Banerjee, AITC-ni membor-rangna aganprakangengon, Meghalaya a·dokara aramrangni dongram aro dingtang dingtang cholrang donggipa a·dok ine mingsingako man·gipa a·dok ong·genchimoba, NPP-chi dilenggipa MDA sorkarini tangka paisarangko jakkalsretanichi aro a·dokni manderangko cha·bokanichi da·o cha·bokan gapgipa a·doksa ong·skaengaha ine parakangaha.
NPP-chi dilenggipa MDA sorkariara BJP-ni ge·etanio pangchake kamko ka·gipa sorkarisa ong·a ineba Banerjee matnangataha.
“NPP-chi dilenggipa MDA sorkari, a·doko songdongenggipa manderangni namgnina kamko ka·ani pal BJP-ni ge·etani gitasa kamrangko ka·skaenga. Meghalaya a·dokara cholrang gapgipa aro aramrangni dongchakgipa a·dok inesa mingsingako man·gipa a·dok ong·achim indiba ia a·dokko uamang tangka jakkalsretan gapgipa biap ong·atengaha. Iako an·ching dingtangatna nangenga maina Meghalaya a·dokde Gujarat-na ba Delhi-na bame on·na man·jawa,” ine AITC-ni national general secretary aganaha.
2023 bilsio Meghalaya a·doko gital sorkariko rikahaon, Bengal-de iano sason ka·jawa indiba Meghalaya a·dokan sason ka·gen ineba Banerjee parakataha.
Conrad-ni bimingko ‘Conman’, MDA-ko ‘My Development Alliance’ mingskachina AITC-ni national general secretary agana
Date:
Share post:
