Sanna banani aro gipin cholrangko pilakan man·na nanga: Chief Justice

TURA: Nangchongmotgipa sanna banani aro gipin cholrangko mande sakantian man·na nanga ine Sonibar salo, Meghalaya High Court-ni Chief Justice Sanjib Banerjee, Garo Hills-ona re·baani somoio jinmana aganangaha.
Sonibar salo, Gambegre C&RD Block-ni ning·o donggipa Sampalgre songo health camp aro legal awareness program-ko ong·atanio, mongsonggipa sokgipa ong·e bakko ra·angenba, Meghalaya High Court-ni Chief Justice, ia kattarangko aganangaha.
Ia program-ko West Garo Hills District Legal Services Authority (DLSA)-ni gita dingtang dingtang department-rang baksa nangrime ong·atangahachim.
Ia program-ko ong·atanio Meghalaya High Court-ni Chief Justice, jinmana aganprakengon, Indian Constitution-on Fundamental Rights ba manderangna dingtang dingtang bilrangko on·manahaoba aro India a·songni jakgitelaniko man·aoni da·o bilsi 75 gappilengahaoba manderang, an·tangtangna on·gimin bilrangni gimin ma·sitokkujaenga ine parakangaha.
Manderangna on·gimin bilrangni gimin talataniko on·angengon, manderang chirangko, ramarangko, bilsi 14-ona kingking indin lekka porako man·an baksana nangchongmotgipa sanna banani aro gipin cholrangko man·na nangchongmota ine Justice Banerjee parakataha.
“Manderang an·tangtangni bilko man·na dakgrikna nanga aro an·tangtangni bilrangko man·kujaskal an·tangtangko parakna nanga. Ia bilrangko man·ahaon manderangni gisepo maming dingtanggrikani gri an·tangtangko dakchakna man·gen,” ine Meghalaya High Court-ni Chief Justice aganaha.
Me·chikrangko mande ra·anichi tom·tomgipa songsalko ong·atna man·gen ineba Justice Banerjee parakataha.
Ia program-ko ong·atanio Meghalaya High Court-ni Justice HS Thangkhiew-ba dongpae jinmana aganprakangengon, Legal Services Authorities Act 1987-ni ning·o on·gimin niam aro miksonganirangko jinmana talate on·angenba, kangal cha·a sianiko bon·atani aro para legal volunteer-rangni giminba talate on·angjolaha.
Ia program-ko ong·atanio dongpae bakko ra·anggipa gipin manderangara, West Garo Hills a·jani Deputy Commissioner Swapnil Tembe, dingtang dingtang songni Nokmarang, dingtang dingtang department-ni officer-rang aro gipinrang ong·a.