SGH-o ka·sinsin obostarang nambapilenga, Sombar dipet Baghmara-oni Nongal-ona chonchongipa garirang re·na man·gnok

BAGHMARA: Batanggimin antirango mikkarang dontonggija waanganichi South Garo Hills a·jani dingtang dingtang biaprango chi banani aro a·arang ruronganichi bang·a manderangan neng·nikanirangko chagrongna nangtokahaoba da·o obostarang ka·sinsin nambapilna a·bachengengaha ine kobor on·aha.
Kobor on·timgiparangni u·iatani gitade, Baghmara-oni Nongalbibra-ona dakanggipa ramao adita dolongrangko chi pe·angahani a·sel re·a doani cholrangko champengatahaoba da·o chonchongipa garirangnade dolongrangko songni manderang, PWD aro gipin department-rangni dakchakanichi taripilna man·aha aro Sombar sal dipetde chonchongipa garirang, ia rama gita re·rurapiltaina man·gnok.
Batanggimin jao mikkarang jimbee waanganichi chirang dal·bae aro a·arang ruronge bang·a nok-jamrang, bagan barirang, rama jal·langrang aro dingtang dingtang biaprang nosto ka·ako man·angahachim aro South Garo Hills a·jao iandakgipa a·selrang ong·anichi komibeoba saksku manderang siangna gita nangahachim.
South Garo Hills a·jao mikkarang jimbee waanganichi nangchakeaniko man·batanggipa biaprangara, Rongara, Siju, Moheskola, Khalu, Kanai aro uandakgipa songrangan ong·ahachim.
Ia jolrango da·o ka·sinsin obostarang nambana a·bachengpilengaha ine talataniko on·angengon, Baghmara-oni Nongalbibra-ona dakanggipa ramako sorkari baksana songni manderang an·tangtangba krenge kamko ka·anichi da·o chonchongipa garirangnade man·aha ine Rongara-Siju-ni MLA Rakkam Sangma parakataha.
Sangma-ni u·iatani gitade, Rongara-ona tarichenggipa ramakoba Sombar salonin watgnok aro Rongdik-Karukol dolongkoba Mongolbar ba uni ja·mande watna man·gnok.
Moheskola-ona Kanai-chipakni re·angna man·kujaengoba, South West Khasi Hills-chipaknide re·bana man·engahani gimin da·o ua jolni manderangna nangchongmotgipa bosturangko sokate on·na man·engaha ineba kobor on·aha.
South Garo Hills a·jao baditaba kingking nok-jamrang aro rama jal·langrang nosto ka·ako man·aha ine sing·sandiaton, da·o dipet dingtang dingtang C&RD Block-rang, noksan ong·a man·aniko hisapkuengani gimin chu·gimikko tale aganna man·kujaenga ine Siju-Rongara MLA parakataha.