TURA: Garo Hills ning·o donggipa Jeldopara A·king-oni Panbari A·kingona kingking gipin biaprangoni napsrukbae songdong a·chaaniko champengna gita GHADC-ni a·arangko name sale ra·china Garo Hills-ni Anti Corruption League (ACL), GHADC-ni CEM Albinush Marak-na sedoataha.
ACL-ni parakatani gitade, gipin biaprangoni napsrukbaenggipa manderang, Nokmarangni ma·sigijaniko chol ra·e, Jeldopara A·kingoni Panbari a·kingona kingking niam gri songdong a·chatokengahachim.
“Ia biaprango napsruke dongenggipa manderang mitamde a·songni dingtang dingtang biaprangoni aro mitamrangde a·songoniba ong·jaenggen. Ia manderang, Nokmarangko cha·boke a·arangko ra·sekenga aro ja·manode ia biaprangko a·kange songdong a·chatokengaha,” ine GHADC-ni CEM-na sedoatgipa chittio ACL parakataha.
ACL-ni parakatani gitade, ia biaprango napsruke songdong a·chaenggipa manderang, Gaonburah, Nokma ba VEC secretary-rangni on·gipa certificate-rango pangchake electoral roll-rango biming segatenga aro job card-rangnaba dorgastorangko galengachim.
“Ia manderang, a·kingrango songdong a·chae a·kawe jolo donggipa polling station sambarango an·tangtangko biming segattokenga,” ine ACL parakatenba, iani bidingo ta·raken ja·kuko de·china GHADC-ni CEM-ko didiataha.
