SHILLONG: A·songni jakgitelanina krengdilanggiparangoni saksa U Tirot Sing Syiem-ko mande ra·pilskaani chin gita uni bimangko (statue) aro Children’s Park-ko kulichina gita uni chang 187-gipa siani salko manianio Tirot Sing Death Anniversary Committee, sorkariko didiangaha.
U Tirot Sing Syiem-ni chang 187-gipa siani salko Robibar salo, Tirot Sing Death Anniversary Committee Hima Nongkhlaw aro Shillong-ni Centre for Historical Research Synod College (CHRSC) nangrime Nongkhlaw-o maniangaha aro ia salko manianio a·dokni Rajya Sabha MP WR Kharlukhi, mongsonggipa sokgipa ong·e jinmana aganprakangengon, U Tirot Sing-ni siani salko Khasi Hills-osan ong·aigija Meghalaya a·dok gimikon manirongchina a·doko songdongenggipa manderangko didiangaha.
“U Tirot Sing, saksa Meghalaya a·dokna aro India a·songni jakgitelanina an·tangko on·kange kam ka·gipa ong·ani gimin uni siani salko a·dok gimikon manina nanga,” ine Kharlukhi aganaha.
A·dokni jakgitelanina krengdilgiparangko mande ra·jagenchimode re·baenggipa chasongni manderangde, iandakgipa manderangni gimin ma·siroroangjawaha aro mande ra·e manianirang dongjawaha ineba ua aganaha.
India a·songni jakgitelanina krengdilgipa sak 115 manderangni bimingko Parliament-o segate donaha ine janapatengon, ia sak 115 manderangoni U Tirot Sing-ba saksa ong·paenga ine a·dokni Rajya Sabha MP parakataha.
U Tirot Sing Syiem-ara 1800 bilsirango British-rangko warachakdilgipa manderangoni saksa ong·chim aro bilsiantian July-ni 17 tariko uni siani salko manirongengachim.
