TURA: Garo Hills-o bijoliko watatani namsrangjaengani gimin aro Garo Hills-ni dingtang dingtang MeECL office-rango kam ka·giparangko chu·onga gita rakkijaengani gimin East Garo Hills a·jani dolbri NGO-rang, chong·motan GSU, FKJGP, AIGU aro FAF dolrang, re·anggipa Bristibar aro Sukrobar salgnina Williamnagar-ni MeECL office-ko kam ka·na on·gija jingjengatangaha.
Ia dolbri NGO-rangni parakatani gitade, Garo Hills-na bijoliko nambate on·china, Power department-o mikkang niteani kam ka·giparangko rakkichina, Garo Hills-na MeECL-o chu·onga gita kam ka·giparangko rakkichina, Garo Hills-o kam ka·giparangko Khasi Hills-ona ra·jitangjachina, MeECL-ko chalainio mikkang niteani gri ong·china, Shillong-o donggipa MeECL-ni head office-o A·chikrangkoba kamo rakkichina dabian baksana 2020 aro 2021 bilsirango Khasi Hills-o bang·en kam ka·giparangko rakkiahani gimin Garo Hills-oba kam ka·giparangko rakkidapchina dabie, Williamnagar-o donggipa MeECL office-ko salgnina office picketing ka·angaha.
NGO-rangni dabienggipani bidingo Power department-ni gita maming aganchakanirangko on·jaengani gimin iana skangba NGO-rang, MeECL-ni kosako poster campaign-ko dake jingjengatangahachim.
Poster campaign-ko dake jingjengatani ja·manoba maming aganchakanirangko on·jahani gimin ia dolbri NGO-rang, Bristibar saloni a·bachenge salgnina MeECL office-ko picketing ka·angaha.
Bristibar salo, Williamnagar-ni MeECL office-ko picketing ka·anio line-o nirokenggiparang aro bill collection counter-kode NGO-rang champengjahaoba, Sukrobar salode bill collection counter-koba chipe donangaha indiba line nirokenggipa manderangkosa champengani dongjahachim.
Indake ong·engon, Williamnagar-ni MeECL office-ko picketing ka·ani ja·mano NGO-rangni dabianirangna sorkarini gita maming aganchakanirangko on·jagenchimode Sonibar salo, NGO-rang apsan chanchirimenba, Power department aro MeECL-ni kosako rakbate jingjengatanirangko dakanggen ine dolbri NGO-rang parakataha.
Salgnina MeECL office-ko picketing ka·anio bakrimanirangko on·ahani gimin NGO-rang, jolo songdongenggipa manderangko aro dingtang dingtang skulrango poraienggipa chatro chatrirangkoba mittelpilataha.
