TURA: Garo Hills-o git ring·anina mingsing minggamako man·baenggipa Monika Momin-ko, Garo Hills-o aro mongsongbate Tura jillarango ta·makku palaniko champengenga ine matnanganiko man·ahani gimin Mongolbar salo, Tura Women’s Police Station-ni me·chik police-rang, uni dongchakenggipa nokoniko sing·sandina gita rim·baaha.
Koborko man·soani gitade, Monika baksana dolsa me·chikrang, Tura jillani dingtang dingtang biaprangona re·roroe, ta·makku palenggipa dokkanrangko sandienba, ta·makku palaniko champengatahachim aro mitam dokkanrangonikode uamang, biri, cigarette-rangkoba rim·ahachim.
Iandake, dokkanrango ta·makku palaniko champengengani gimin adita sak dokkan dakenggipa manderang, Monika Momin aro uni dolni kosako police-rangna FIR ka·doangaha aro uandaken police-rang, iani bidingo sing·sandina gita Monika-ko Mongolbar pringo Chengkurigre songo donggipa uni nokoniko rim·e ra·baaha.
FIR-ko re·anggipa antini Bristibar salo, Tura police station-o ka·ahachim aro FIR-o parakani gitade, Monika aro dolsa me·chikrang, Tura jillani dingtang dingtang biaprango ta·makku palaniko dontongchina gita dokkan dakgiparangko ka·mikkenatahachim.
Ta·makku palaniko champenganina rim·ako man·gipa Monika Momin ba Monika Singer-ara, dingtang dingtang gitrang, jekai ‘MB bon·angpila’, ‘Tik Tok’, ‘Hira hira’ aro uandakgipa gitrangko ring·e mingsing minggambaenggipa me·chik ong·achim ine nikna man·a.
