SHILLONG: Re·baenggipa bilsionide Meghalaya Legislative Assembly-ni membor-rang, Assembly ning·o Khasi aro Garo ku·sikchiba jera ra·grikna man·gnok.
A·dokni Deputy Chief Minister Prestone Tynsong-ni parakatani gitade, Assembly-ni membor-rangko, re·baenggipa bilsini Budget Session-onide Khasi aro Garo ku·sikrangchiba Assembly-ni kamrango bak ra·pana on·gnok.
Sombar salo, Dr Bashida Massar-ni segipa ‘Ka Lapalang Ha Ri War’ ki·tapko Shillong songjinmani St Anthony’s College-o oprake on·anio jinmana aganprakangengon, Khasi aro Garo ku·sikrangko Assembly-o jakkalna gita pe·timgiparangkoba seokna nanggen aro Assembly-o hall-o dingtangmancha ostrorangkoba songe on·na nangengani gimin September jao ong·atna sienggipa Autumn Session-ode iako a·bachengatna man·kujawa indiba mikkang bilsini Budget Session-ode iako a·bachengatna man·gnok ine Deputy Chief Minister parakataha.
“Ian Khasi aro Garo ku·sikrangni man·e cha·aniko chingni a·gilsakna mesokna jotton ka·aniko a·bachengatani ong·enga. Iako a·bachengatanichi chinga ia ku·sik minggniko Constitution-ni Eighth Schedule-o ra·gatchina ma·mong sorkariko didianiba ong·enga,” ine Tynsong aganaha.
Khasi aro Garo ku·sikrangko Eighth Schedule-o ra·gatchina gita a·dok sorkari, dontonggija ma·mong sorkari baksa agangrikengkua ineba ua parakataha.
