AMPATI: Azadi ka Amrit Mahotsav-ko maniani bak gita Sombar aro Mongolbar salrango Power Ministry aro South West Garo Hills District Administration nangrimenba, ‘Bijli Mahotsav’-ko Gasura aro Anangpara songrango manidilangaha.
Gasura songo ia Bijli Mahotsav-ko manianio Betasing Block-ni BDO Leena Daring Sangma, NEEPCO-ni Nodal Officer aro General Manager Ranjan Mallick, MePDCL-ni Executive Engineer CM Marak, VEC secretary, songko nokko dilgiparang aro songni manderangba dongpae bak ra·angaha.
Anangpara songo ia Bijli Mahotsav-ko manianio Zikzak-ni Animal Husbandry & Veterinary Officer Dr BBM Sangma, NEEPCO-ni Nodal Officer aro General Manager Ranjan Mallick, MePDCL-ni Executive Engineer CM Marak, Anangpara songni Nokma aro gipinrangba bakko ra·angskaaha.
‘Ujjwal Bharat Ujjwal Bhavishya-Power@2047’-ni ning·o Power department-ni chu·sokatgipa mongsonggipa kamrangni bidingo songni manderangna u·iatna gita July 21 tarikoni July 31 tarikona, dingtang dingtang biaprango cultural program-rangko, kan·dikgipa jawilwat mesokaniko aro uandakgipa dingtang dingtang program-rangko ong·atengachim.
