RESUBELPARA: Azadi ka Amrit Mahotsav-ko maniani bak gita Power sector-ni chu·sokanirangko mesokna Budbar salo, ‘Ujjwal Bharat-Ujjwal Bhavishya – Power @2047’-ko North Garo Hills a·jani Mendipathar Multi Purpose Cooperative Society Hall-o maniangaha.
Ia program-ko ong·atanio, North Garo Hills a·jani Deputy Commissioner RP Marak, mongsonggipa sokgipa ong·e jinmana aganprakangengon, bijoliko on·na gita rakbee kamrangko ka·engani gimin MeECL-ni official-rangko aro gipin kam ka·giparangko mittelpilangaha.
“Mikka balwa rakan somoirango aro dingtang dingtang a·selrangchi bijolirang nosto ong·atako man·on, Power department-o kam ka·enggipa manderang, bijoliko on·pilna gita rakbee kamrangko ka·na nangronga. Uni gimin ia salara uamangko mittelpilna gita namgipa sal ong·enga,” ine Marak aganaha.
Meghalaya a·dokni Chief Minister Conrad Sangma-ni a·bachengatgipa Hydroger Mission-ni giminba ia tom·anio ua jinmana talate on·angaha. Ia mission-ni ning·o dam 220 Hydroger project-rangko a·dokni dingtang dingtang biaprango kuligen ineba North Garo Hills a·jani Deputy Commissioner parakataha.
Ia tom·anio North Garo Hills a·jani Additional Deputy Commissioner ZJ Sangma-ba dongpae jinmana aganprakengon, Ujjwal Bharat-Ujjwal Bhavishya – Power @2047 program-chi India sorkari, India a·songni pilak kona noksikrangon bijoliko teng·atna miksongenga ine parakangaha.
Ia program-ko ong·atanio dongpae jinmana aganprakanggipa gipin manderangara, District Nodal Officer Rezwanur Rehman aro gipinrang ong·a.
