SHILLONG: Meghalaya a·dokni gitcham home minister aro Congress dolni gitcham dilgipa RG Lyngdoh-ni sianina Sukrobar salo, Meghalaya Pradesh Congress Committee (MPCC)-ni kalime tom·aniko Shillong songjinmani Congress Bhawan-o ong·atangaha aro ia tom·anio a·dokni dingtang dingtang biaprango donggipa Congress dolni member-rang dongpae bak ra·angtokaha.
Ia tom·anio, a·gilsakko watanggipa dingtangmancha Congress dolni member-rang minute-gnina jrip donge mande ra·pilskaaniko dakangaha.
“Robert Garnett Lyngdoh, saksa mingsing minggamako man·gipa dilgipa ong·e Meghalaya a·dokni Cabinet Minister aro a·dokni dal·dalgipa kamrangko ka·anggipa mande ong·achim. Uni a·dokna aro an·tangni manderangna on·kange kam ka·aniko mamingchiba tona man·jawa aro a·doktangna pilakni gitan namroro silroroaniko ra·bana bang·en on·gilangaha. Ua Congress dolnaba an·tangko on·kange kam ka·gipa ong·achim aro 2000 bilsioni 2007 bilsiona kingking Shillong City Congress-ni president ong·e kamko ka·angaha. Ua Nongthymmai Block Congress Committee-niba block president ong·e kamko ka·angaha aro Congress dol uko gimaate namen noksan ong·aha. Uni sianina chinga Meghalaya Pradesh Congress Committee, kalimaniko kattachi parakna amja aro uni donanggipa bangbang ong·aniko chinga gapatna man·jawaha,” ine MPCC parakataha.
Gitcham home minister RG Lyngdoh-ni sianina a·dokni gitcham Speaker AT Mondal-ba kalimpaaniko parakataha. “Bah Bob-ni tanggitik sianiko knasoe anga namen jagokmanpilaha. Ua saksa namgipa ripeng aro kakketko sandigipa mande ong·e a·dokko ra·dona bang·en on·gilangaha. Uni sianina anga an·tangni kalimaniko kattachi parakna ampiljaha. Uni nokdangna Nokgipa Isol ka·dimeaniko aro pattianiko on·skachina,” ine Mondal, seachi parakataha.
