SHILLONG: Meghalaya a·dokni Khasi Hills jolrango bobil dake chakatenggipa Hynniewtrep National Liberation Council (HNLC) dolni chang 35-gipa raising day-ko Jaiaw-ni Jingthang Briew samba jolo donggipa dolongo nisanko songdoenba maniangaha ine u·iataha.
HNLC bobil dolni publicity secretary Sainkupar Nongtraw-ni Facebook page-o parakatani gitade, HNLC dolni nisanko bobil dolni membor saksa pringni bako songdoaha.
HNLC bobil dolko 1987 bilsini August 14 tariko bikotahachim.
Indake ong·engon, HNLC bobil dolni nisan songdoani bidingo police-rang Robibar attamchibara kobor man·soaha aro bakan ia nisanko ra·galeaha ine a·dokni saksa police officer parakataha. Iani bidingo police-rang name am·sandienga ineba ua parakataha.
HNLC bobil dolni tom·tomaniona re·bana gita sorkari baksa agangrikaniara politics-ni gita dingtanganiko ra·bagen aro ian a·doko songdongenggipa Tribal manderangko mangrakbatatna gita namgnirangko ra·bagen ine adita salrangna skangsan HNLC bobil dol parakatahachim.
