TURA: Assam aro Meghalaya sorkarirangni memorandum of understanding (MoU)-o soi ka·grikanichi Meghalaya a·dok ning·o ga·akgipa mitam A·chik songrangko Assam-o man·angengani gimin jegalna gita re·baenggipa Sombar salo, Garo Hills-ni dolbri NGO-rang, chong·motan Association for Democracy & Empowerment (ADE), A·chik Youth Welfare Organisation (AYWO), Federation of Khasi, Jaintia & Garo People (FKJGP) aro Federation for A·chik Freedom (FAF) dolrang, Shillong Civil Hospital-ni sambao U Kiang Nangbah-ni statue-ko tarie dongipa biapo jinma asonge jingjengataniko ong·atdilenga ine u·iataha.
Dolbri NGO-rangni parakatani gitade, Assam aro Meghalaya sorkarirangni MoU-o soi ka·grikanichi Meghalaya a·doko ga·akgipa mitam A·chik songrangko Assam-o napatahani a·sel ia songrango donggipa manderang aro ia jolrango donggipa dingtang dingtang dolrang, Garo Hills-ni NGO-rangkoba dakchakchina mol·molatahani gimin batanggimin somoirangoba ia dolrang, changni chang jinma tom·bimonganirangko ong·ate ia MoU-ko den·galpilchina Meghalaya sorkariko aro a·dokni Chief Minister-ko didiahachim indiba a·dok damgnini sorkarirangan ia MoU-ko den·galpilna aro ia kamko nipiltaina jechakskaengachim.
“Meghalaya a·doko ga·akgipa A·chik songrangko Assam-o napatengani a·sel ia songrango donggipa manderang duk mikchirangko chakna nangengani gimin chinga changni chang a·dokni dilgiparangko aro a·dok sorkariko mol·molahaoba chingni mol·molanirangko knachakna gisiko nangjaenga. Uni gimin A·chikskani duk mikchini somoio dakchakaniko on·na gita an·ching A·chik jat gimikan bakrimaniko on·na nangenga,” ine ADE-ni president Dalseng Bira Ch Momin parakatenba, ia dolbri NGO-rangni asonge jingjengataniko ong·ataniona re·bae bakko ra·echina gita dingtang dingtang dolrangko aro a·dok gimikon songdongenggipa manderangko didiataha.
