TURA: Meghalaya Police-ni u·iataniko man·soani ja·man, Andhra Pradesh a·dokni Gunther Railway Station-o manderangni rim·e donenggipa Williamnagar DC Colony-oni bilsi 25 ong·gipa chadambe Tengrik Momin-ko Andhra Pradesh a·dokni police-rang jokatna dakchakataha ine kobor on·aha.
Koborko on·ani gitade, Tengrik Momin, an·tangni ripengrang baksa Goa-ni company ge·sao kam ka·na inenba rel gario re·angengachim indiba Gunthur Railway Station-o ua ong·onani ja·man, adita neng·nikaniko chagrongna nangahachim.
Uni iandake neng·nikaniko chagrongengmiting somoio uni nokgipa Asma Momin, East Garo Hills a·jani Superintendent of Police (SP)-na u·iataha aro bakan SP, Andhra Pradesh-ni police-rangna u·iatskae, ia chadambeko jokatchina mol·molataha.
Da·o ia chadambeko Andhra Pradesh-ni police-rang rimangaha aro ia chadambeko Williamnagar-ona rimbapilna gita East Garo Hills a·jani dolsa police-rangko Andhra Pradesh a·dokona watataha ine kobor on·aha.
