TURA: Mongolbar pring 10:45 bajimango, North Garo Hills a·jani dingtang dingtang biaprango niam gri palna ra·angenggipa churangko AS-18D 3494 Tata Nano garioniko police-rang rim·aha.
Police-rangni u·iatani gitade, ia churangko North Garo Hills a·jani Dekachang bazar aro Nangaburi bazar-o niam gri (black) chu palgiparangna ra·angengachim aro ia gariko North Garo Hills a·jani police-rang, rim·enba Resubelpara Police Station-ona ra·angaha.
Ia garioniko police-rang am·sandianirangko dakon, gong 60,000-mangni churangko man·aha ineba North Garo Hills a·jani police-rang u·iataha.
