Mukul-ni ka·e donanggipa kamrangko MDA sorkari a·kangenga ine TMC matnanga

TURA: Meghalaya a·dokni gitcham chief minister Dr Mukul Sangma-ni dilanichi gitcham sorkarini ka·e donanggipa kamrangko NPP-chi dilenggipa MDA sorkarisa a·kanggopna jotton ka·skaenga ine Mongolbar salo Trinamool Congress (TMC) matnangataha.
Mongolbar salo TMC-ni tom·aniko Gambegre-o ong·atanio ia kattarangko TMC-ni dilgipa aro Rangsakona-ni MLA Zenith Sangma parakataha.
NPP-chi dilenggipa MDA sorkari, me·chikrangna maming simsak nirokanirang dongsrangjaenga ine matnangatengon, gitcham sorkarini somoio Dr Mukul Sangma, me·chik sakpraknan an·tangtangni nokdangko chalaina gong 5000/- ka·e on·rongachim indiba MDA sorkari jako ra·a intalan ia scheme-ko da·o ong·enggipa chief minister Conrad Sangma bon·atsrangaha ine TMC-ni dilgipa Zenith Sangma matnangataha.
“Assembly-o JICA aro World Bank-ni tangkarangko sorkarini jakkalsretani bidingo sing·anirangna da·onan aganchakaniko on·na man·kujaenga. Da·o election-na skang MDA sorkari, FOCUS program-ni tangkarang ine nokdang ge·prakna gong 5000/-ko suale on·mika dakenga indiba ia tangkarangara NPP-ni tangkarang ong·ja aro ma·mong sorkarini on·atgipa tangkarangsa ong·a,” ine Sangma parakataha.
NPP-chi dilenggipa MDA sorkari, dingtang dingtang scheme-rangko matchotgija galchipenga ine matnangatengon, gitcham sorkarini somoio Dr Mukul Sangma-de Chief Minister’s Social Assistance Program-ko a·dok sorkarini tangka paisarangchin a·bachengate on·ahachim indiba ia scheme-koba MDA sorkari ra·gale galaha ine Zenith parakataha.
Ia tom·bimonganio GHADC-ni TMC MDC Sadhiarani Sangma-ba dongpae jinmana aganprakangengon, skigiparangni nanganirangko chu·sokate on·na man·jaengani gimin MDA sorkariko matnange aganangaha.
“Batanggimin bilsibrina MDA sorkari, a·dokni manderangko cha·bokesa chalaibaaha. A·dok gimikon skigiparang dormaharangko man·jae neng·nikanirangko chagrongna nangtokenga indiba ia sorkari skigiparangni grapanirangko knachakna gisiko nangjaenga. Kakketko agangenchimode ia MDA sorkari a·dok gimikon aro mongsongbate Gambegre constituency-o maming kamrangkon chu·sokata dongsrangjaha,” ine Sadhiarani aganaha.
Ia tom·bimonganiko ong·atanio dongpae bakko ra·anggipa gipin manderangara, Mahendraganj-ni TMC MLA Dikkanchi D Shira, Chokpot-ni TMC MLA Lazarus M Sangma, Salmanpara-ni TMC MLA Winnerson D Sangma, Kharkutta-ni TMC MDC Cherak W Momin aro gipinrang ong·a.