TURA: Tribal area-rango Meghalaya Cabinet-ni CrPC, 1973 aro CPC, 1908-ko ra·gatna am·anina Garo Hills-ni Association for Democracy and Empowerment (ADE) jagokman·an baksa iako ra·gatahaode gitcham judiciary system-ko namjabatatgen aro Sixth Scheduled state-o tribalrangni chol man·arangko komiatgen ineba mikrakatjolaha.
“Chingni dingtangmanchagipa jat ong·anio, dakbewalrango, daka-rikanio bebera·anio ugita jattangni gipin dakbewalrangko ja·rikenba Meghalayao songdonggipa chinga Garo, Khasi, Jaintia gimikan gipin tribalrang baksa an·tangtangni mikkim rasongo janggi tangna ska. Unigimin iako ra·gatanichi ja·man ja·wilo neng·nikanirangko chagrongna nangjana gita bon·kame ra·chakna skangba namedake chanchie nichengchina gita chinga, sason ka·enggipa aro opposition-oni jeoniba ong·chong pilak MLA-rangko aro GHADC, KHADC, JHADC-ni MDC-rangko mol·molenga” ine ADE president Dalseng Bira Ch Momin aganaha.
Sorkarini kosako chadrape aganengon, ia ma·sina ampilgijani ong·a, saksa tribal Chief Minister-chi re·dilgipa sorkari ong·eba maina Meghalaya-ni District Council Courts, Village Courts, Laskars, Nokmas, Sardars, Doloi, Traditional Head ugita dakgipa customary institution-rangni bilko bilgriatna aro bon·atna sorkari chanchia, ADE aganaha.
Da·oni sorkari changni chang ong·pile, daito gnanggiparang baksa maming agangrikchengani gri bang·akon an·tangtangari tik ka·rongenga ine jaksi ote aganengon, Association, sorkari indakgipa kamrangko nichae dongjawa, nanga ong·ode a·dok gimiko jingjengataniko dakgen ineba Momin mikrakataha.
Indake ong·engon iani bidingo namedake chanchipilchina agita Association, pilak MLA aro MDC-rangko mol·molaha, ong·jaode songdonggipa manderangna neng·nikaniko ra·bagen ineba aganaha.
