SHILLONG: Politician-rang manderangko cha·bokronga agangipani gimin BJP-ni a·gipi dilgipa MLA AL Hek mijal Bristibar salo Deputy Chief Minister Prestone Tynsong-ni kosako matnange aganaha aroba Tynsong-ni constituency-ni manderangna mikrakna haida ia somoion namchamiting ong·gen ineba Hek aganaha.
“Bilsi 20 na cha·boka man·engaha ong·ode Prestone Tynsong-na chakgiparangna ian de·mesaani ong·gnok,’’ Hek aganaha.
‘‘Election susagipa candidate-rangko man·chape chinga MLA-rang, pangnan puongiparangko jada dakatronga aro puongiparangba pangnan chingchi altuen cha·bokako man·ronga. Ian namja. Chinga bilsi bongaprakon uamangko cha·bokronga aro bilsi bongaprakon uamang chingchi cha·bokako man·ronga’’ ine Mawlai-o party-ni manderangni tom·bimonganio Tynsong-ni agangipana gitcham health minister aganchakataha.
Tynsong gita dakgipa chugipa gadangogipa dilgipa iandakgipa kattarangko aganna kraja, ua saksa dilgipa ong·e dilgipa gita re·dilna aro kam ka·na nanga, Hek aganaha.
