SHILLONG: Salgro salaram jol gimiko Meghalaya a·dokan me·chikrangni kosako ong·gija dakanio bang·batgiparangoni gittamgipa ong·enga aro bi·sarangni kosako ong·gija dakanioba gnigipa ong·engani gimin ian a·doko niam retirangko nirokanio namgijaniko mesokani ong·enga ine Budbar salo, Umroi constituency-ni TMC MLA George B Lyngdoh, an·tangni suk ong·gijaniko parakataha.
Lyngdoh-ni parakatani gitade, National Crime Records Bureau (NCRB)-ni am·sandie see rakkianio salgro salaram jol gimiko Meghalaya a·dokan me·chikrangni kosako ong·gija dakani case bang·batgipaoni gittamgipa ong·enga maina 2019 bilsio ming 558 case-rang, 2020 bilsio ming 568 case-rang aro 2021 bilsio ming 685 case-rangko Meghalaya a·doko segatahachim.
Bi·sarangni kosako ong·gija dakgipa case-rangni gimin janapatskaengon, 2019 bilsio ming 379 case-rangko, 2020 bilsio ming 415 case-rangko aro 2021 bilsio ming 481 case-rangko Meghalaya a·doko segatahani gimin ian salgro salaram jol gimiko gnigipa ong·enga ine TMC MLA parakataha.
Myanmar a·songoni Muslim manderangko Shillong songjinmao nikenga ine jangbingbanganirangko knasona man·engani gimin janapatengon, ian kakket ong·bebegenchimode intelligence-ni kamrangko bilakbatatna nangao ga·akenga ine Lyngdoh parakataha.
Ia chanchirimanio Mawsynram-ni MLA HM Shangpliang-ba bak ra·angpaengon, adita salrangna skang Jaintia Hills-o manderangni jinma dokgrime siatgipako toe aganangenba, a·doko manderang niamko jaktango ra·na a·bachengengahani gimin ian manderangni police-rango ka·dongani gri ong·aniko mesokani ong·engaha ine an·tangni suk ong·gijaniko parakataha.