SHILLONG: Meghalaya a·dokni pilak biaprangon chadamberang kamgri ong·e dongna nangtokengani gimin sorkarini kosako jegalna gita re·baenggipa October 21 tariko jinma tom·e re·jomaniko ong·atenga ine Sombar salo, Federation of Khasi, Jaintia & Garo People (FKJGP) parakataha.
Iani bidingo kobor ra·timgiparangna u·iatengon, ia re·jomaniko Shillong songjinmao, Motphran-oni Malki Ground-ona ong·atanggen ine FKJGP-ni president Dundee Khongsit parakataha.
FKJGP dolni gita am·sandie man·ani gitade, Meghalaya a·dok gimiko sak lak 1.60-mangni gita chadamberang kamgri ong·e dongna nangtokenga ineba Khongsit parakataha.
“Indita bilsirang re·angaha aro bang·a chadamberangan an·tangtangni neng·nikanirangko chingona re·bae paraketokeahani gimin chinga suk ong·ja. Ia pilakan a·dok sorkarini, dingtang dingtang department-rango bangbang ong·e dongenggipa kamrangko gapatna gisik nangjaengani a·selsa ong·enga,” ine Khongsit aganaha.
A·doko kamgri ong·e dongenggipa chadamberang, an·tangtangni suk ong·gijaniko parakna man·na gitasa ia re·jomaniko FKJGP ong·atenga ineba ua parakataha.
A·dok sorkarini department-rango contractual post-rangko on·engani giminba FKJGP suk ong·gijaniko parakataha.
“Contract-ni bewalo kam ka·enggiparang sorkarioniko maming naljokanirangko man·tokjaenga, uni gimin sorkari department-rango contractual post-rangko bon·atchina chinga nangnikenga,” ine FKJGP-ni president parakataha.
Sorkari kamrangna kam ka·giparangko ra·engon maming dongnuani gri ra·china gitaba ua sorkariko didiataha.
“Kamna personal interview aro gipin porikkarangko ra·engon, camera-o chipe ra·china gita chinga ku·pattianiko on·enga,” ine Khongsit parakataha.
