SHILLONG: NPP-chi dilenggipa MDA sorkariko tangka paisa jakkalsretanina matnange, media-ni mikkango jera ra·grikna gita NPP-ni dilgipa aro a·dokni Deputy Chief Minister Prestone Tynsong-ko ra·biahani gimin Trinamool Congress (TMC)-ni national spokesperson Saket Gokhale-ko manderangni mikkango jera ra·grikna gita Rajya Sabha-ni MP aro National People’s Party (NPP)-ni state president WR Kharlukhi ra·biatskaaha.
“2023 bilsio a·dokni manderangsa an·tangtangni dilgiparangko seokna sienggiparang ong·ani gimin ua ka·dongmanchagipa ong·ode angni campaign ka·na re·enggipa biaprangchi angko ja·rikchina aro chinga manderangni mikkango jera ra·grikna man·gen,” ine Kharlukhi parakataha.
Shillong Smart City project, gital Assembly building-ni protchong be·gruani aro uandakgipa sorkarini dingtang dingtang kamrangni bidingo Meghalaya a·dokni Deputy Chief Minister Prestone Tynsong-ko media-ni mikkango jera ra·grikna gita All India Trinamool Congress (AITC)-ni national spokesperson Saket S Gokhale ra·biatahachim.
Indake ong·engon, uasa NPP-ni state president ong·engani gimin Tynsong-ni pal ukosa TMC-ni dilgipa ra·bina nangachim ineba Kharlukhi parakataha.
“Meghalaya a·doko TMC-ni unit-an dongengode maini gimin TMC-ni national spokesperson-sa a·dokni kamrangna sko saskana nangenga? Ian Bengal-ni TMC dolko niamna Meghalaya a·doko donako mesokani ong·enga,” ine NPP-ni state president aganaha.
Adita salrangna skangsan, AITC-ni national spokesperson Saket Gokhale, NPP-ni dilgipa aro a·dokni Deputy Chief Minister Prestone Tynsong-na chitti sedoatenba, “September-ni 21 tariko na·a Meghalaya a·dokni dingtang dingtang media-rang baksa press conference-ko ong·ataha, jeon Shillong Smart City Ltd, gital Assembly building-ni protchong be·gruani aro uandakgipa sorkarini ka·sretgipa kamrangni bidingo media-ni manderang nang·ko sing·doangaha. Ia apsan sing·anirangkon anga TMC-ni pal, batanggimin jagnina skangonin Meghalaya sorkario sing·engahachim,” ine parakatahachim.
“Ia sing·anirangna aro matnanganirangna na·a maming aganchakanirangko on·na man·jaha aro batesa angko iani bidingo Shillong-ona re·bae sandie ra·echina aganaha. Batanggimin jagnini gisepo anga changni chang Shillong-ona re·angaha aro sorkarini bang·a dakgualanirangko nikna man·aha,” ineba Gokhale parakatahachim.
Ia antini gisepon ua Shillong-ona re·bapilenga ine parakatengon, “Angni Shillong-ona re·anganio angni aro TMC-ni sing·doenggipa kamrangni gimin aro sorkarini dakgualgipa kamrangni gimin anga media-ni mikkango nang baksa jera ra·grikna ra·bienga. Na·a October-ni skanggipa antio je salkoba ra·aibo angnade ong·aigen. Ia angni ra·bianiko ra·a ra·chakgen ine anga ka·dongenga aro nang·ni aganchakanina sengenga,” ine AITC-ni national spokesperson ra·biatahachim.
Iani bidingo Tynsong-o sing·sandiatskaon, ‘Ua re·baaichina’ ine aganenba, iani bidingo mamingkoba agandapna jechakskaaiaha.
Indake ong·engon, NPP-chi dilenggipa MDA sorkarini kam ka·sretanirangko jinma ma·sie ra·china gitasa jera ra·grikaniko dakna ra·bienga ine TMC-ni MLA George B Lyngdoh-ba parakataha.
Jera ra·grikna ra·bianiko jechakgenchimode ian sorkarini dongnuna jotton ka·aniko mesokani gitasa ong·aignok ineba Lyngdoh parakataha.
