WILLIAMNAGAR: Jal Jeevan Mission (JJM)-ni ning·o songni nokni manderangna chirangko sale on·na gita sorkari, GI ba HDPE pipe-rangkosa jakkalchina ge·etaniko on·ahaoba, East Garo Hills a·jani Songsak C&RD Block-ni ning·o donggipa Koknal Imong songo, ia kamna PVC pipe-rangkosa jakkalskaaha ine songni manderang matnangataha.
Koborko on·ani gitade, ia songo JJM-ni kamrangko 2020 bilsion matchotatahachim indiba da·alona kingkingan songni nokni manderang chi tingtotsakoba man·tokkujaengachim.
Ia songo dam 70-na baten nokdangrang gnang aro ia nokdangrangna chirangko sale on·anio gong lak 25-mangni gita koros ong·ahachim ine kobor on·aha.
PHE-oni koborko on·ani gitade, ia project-ko West Garo Hills a·jani contractor Sahidur Rehman minggipana on·ahachim indiba una chame on·gipa tangka paisarangara GI pipe-rangko brena gita chu·ongjani gimin ua Songsak PHE-ni JE-o sing·enba, PVC pipe-rangko jakkalskaaha ine ia contractor parakataha.
Ia songo JJM-ni kamna PVC pipe-rangko jakkalani gimin sing·sandiaton, JJM-ni kamna on·gipa GI pipe-rangko songni manderangan cha·uahani a·sel PVC pipe-rangkosa jakkalskana nangaha ine official-rang parakataha.
Indake ong·genchimoba, GI pipe-rangko cha·ua ine matnanganiko songni manderang jegalatskaaha aro ian uamang an·tangtangni namgninan ong·engode maini gimin pipe-rangko cha·una nanggen ine songni manderang sing·doatskaaha.
“Ia project-ara chingni namgninan ong·engode maini gimin chinga ia pipe-rangko cha·ugen? Kamrangko a·bachengaonin chinga department baksa bakrimaniko on·enga aro PVC pipe-rangara altuaen bretaiani gimin PVC pipe-rangko jakkaljachina chinga mol·molahachim. Indake ong·genchimoba uamang chingni kattarangko knachakjaha. Tangka paisarang chu·ongjagenchimode maini gimin sorkarina badi ka·dona man·jaha?” ine songni saksa Rakbat Momin sing·doataha.
